Azərbaycan Kinorejissorlar Gildiyasının rəhbəri, rejissor Hüseyn Mehdiyev müəllif qonorarlarını ödəmədiyi və hüquqi qaydaları pozduğuna görə, “Xəzər” TV və “İTV”-ni məhkəməyə verib.
Məlumatı H.Mehdiyevin özü RATİ-yə bildirib: “Axırıncı məhkəmə prosesi bir ay bundan əvvəl 1 saylı yerli İqtisad Məhkəməsində olub və bir həftə ərzində məhkəmənin qərarı olacaq”.
Kinorejissorlar Gildiyasının audiovizual əsərlərin, müəlliflərin və bu sahədə digər hüquq sahiblərinin maraqlarını qoruduğunu, nəzarətini həyata keçirdiyini bildirən H.Mehdiyev qaldırdıqları iddianı tam əsaslı hesab edir: “Hər bir ekran əsərinin yayımlanması üçün qonorar ödənilməlidir. Burada söhbət təkcə filmlər deyil, həm də audiovizual əsərlərdən gedir. Məsələn, klip, sənədli film, cizgi filmi və ya tamaşa. Bunların yayımlanması üçün hər bir müəllifə qonorar ödənilməlidir. “Xəzər” TV ilə yanaşı “İTV”-də müəlliflərin qonorarını ödəmək istəmir”.