“XURAL” QƏZETİ MİTİNQ BARƏDƏ QƏRAR VERDİ

may 25th, 2011
Mayın 24-də “Xural” qəzetinin baş redaktoru Əvəz Zeynallı ölkədə söz və ifadə azadlığının boğulmasına etiraz əlaməti olaraq, mitinq keçirilməsinə yer ayrılması üçün  Bakı Şəhər İcra Hakimiyyətinin başçısı Hacıbala Abutalıbova müraciət edib. Bu barədə bu gün (25 may)  Reportyorların Azadlıq və Təhlükəsizlik İnstitutuna (RATİ) “Xural” qəzetinin baş redaktoru Əvəz Zeynallı məlumat verib.

Baş redaktorun sözlərinə görə, məqsəd demokratik üsullardan və konstitusion hüquqlarından istifadə etməklə, ölkədə bu sahədə baş verənlər barədə cəmiyyəti məlumatlandırmaq, başlıca olaraq Azərbaycan xalqını yardıma çağırmaq və onu azad sözə basqıda yanlarında olduğunu görməkdir:

            “Xural” qəzeti olaraq 2002-ci ildən – 9 ildir ki,  fəaliyyət göstəririk. Bu illər ərzində “Xural” qəzeti nə az, nə çox – düz 29 dəfə məhkəmə çəkişməsi ilə üzləşib və  onların əksəriyyətindən uğurla çıxıb. Ədalətsiz məhkəmə cərimələri, kəsilən maliyyə sanksiyaları, qoyulan digər məhdudiyyətlər bizi yolumuzdan döndərə bilməyib. Bu gün də ədalətsiz məhkəmə orqanlarının kəsdiyi haqsız maliyyə sanksiyaları bizi taqətdən salmaqdadır. Buna görə də konstitusion hüququmuzdan istifadə edərək, iyun ayının 19-da, həftənin bazar günündə, saat 19.00-20.00 saatlarında “Azadlıq” meydanında mitinq keçirəcəyik”, –  deyə qeyd edən  Əvəz Zeynallı sonda bildirdi ki,  Bakı Şəhər İcra Hakimiyyətinə edilən müraciətdə alternativ mitinq meydanları kimi  Nərimanov kinoteatrının qarşısındakı meydan, Füzuli meydanı və Sahil bağını  da  göstəriblər.