Mayın 25-də Ali Məhkəmədə hakim Şahmurad Hidayevin sədrliyi ilə 25 noyabr 2010-cu il tarixində elan edilmiş 103.3 FM tezliyi üzrə radio yayımı müsabiqəsində iştirak etmiş “Obyektiv – Televiziya və Radio Yayım Şirkəti” Məhdud Məsuliyyətli Cəmiyyətin təsisçiləri Emin Hüseynov, Mehman Əliyev və digər iddiaçı Rəsul Cəfərovun Milli Televiziya və Radio Şurasına qarşı bir icraatda birləşdirilmiş iddiaları üzrə 28 mart 2011-ci il tarixli qərarından verilən kassasiya şikayəti üzrə məhkəmə prosesi keçirilib.
İddiaçıların vəkili Elçin Sadıqov lisenziyanın “Golden Prince” MMC-yə verilməsinin qanunsuz olduğunu və buna görə də kassasiya şikayətinin təmin edilməsini hakimdən xahiş etdi.
Rəsul Cəfərov isə bildirdi ki, lisenziya verilərkən Milli Televiziya və Radio Şurası tərəfindən müəyyən qanun pozuntularına yol verilib və buna görə də o kassasiya şikayətinin təmin edilməsini xahiş edib.
“Obyektiv-Televiziya və Radio Yayım Şirkəti”nin nümayəndəsi Günay İsmayılova isə bildirdi ki, lisenziya verilərkən pozulan hüquq normaları Apellyasiya məhkəməsi tərəfindən də nəzərə alınmayıb və kassasiya şikayəti üzrə qərar çıxarılarkən bunları da nəzərə almağı hakimdən xahiş edib.
“Obyektiv-Televiziya və Radio Yayım Şirkəti” MMC-in təsisçisi Emin Hüseynov bildirdi ki, lisenziya verilərkən onlara qarşı ayrı-seçkilik edilib, eyni zamanda lisenziya qanunsuz olaraq “Golden Prince” MMC-yə verilib.
Digər təsisçi Mehman Əliyev isə bildirdi ki, media sahəsində kifayət qədər işlər görmüş şəxslər kimi təcrübələri olsa da, lisenziyanın kadr tərkibi və gördüyü işlər baxımından da daha təcrübəsiz olan “Golden Prince”ə verilməsi qanunsuzdur.
Müşavirədən qayıdan hakim kassasiya şikayətinin təmin edilmədiyini bildirdi.
Xatırladaq ki, Milli Televiziya və Radio Şurası noyabrın 25-dən dekabrın 25-ə kimi 103.3 FM tezliyi üzrə radio yayımı üçün müsabiqə elan etmişdi. Müsabiqədə üç iddiaçı “Obyektiv-Televiziya və Radio Yayım Şirkəti”, “Golden Prince ” MMC və fiziki şəxs Rəsul Cəfərov iştirak edib. Müsabiqənin qalibi isə “Golden Prince” MMC elan edilib. Müsabiqədə iştirak edən digər iddiaçılar qanunun tələbinə əsasən apellyasiya məhkəməsinə müraciət edib.
Qeyd edək ki, 2009-cu ilə qədər 103.3 tezliyində BBC radiostansiyası yayımlanırdı. Lakin 2010-cu il yanvarın 1-dən hökumət BBC-nin və eyni zamanda «Amerikanın səsi» və «Azadlıq» radiolarının yerli tezliklərdə yayımını dayandırıb.