“Xural” qəzetinin baş redaktoru Əvəz Zeynallı ölümlə təhdid edilib. Bu barədə bu gün (27 iyun) Reportyorların Azadlıq və Təhlükəsizlik İnstitutuna (RATİ) Ə. Zeynallı məlumat verib.
“Bu gün saat 11:42 radələrində 050 211 84 76 nömrəsindən mobil telefonuma zəng gəldi. Zəng edən şəxs özünü Binəqədi Rayon Polis İdarəsinin rəisi Ağalar Məhərrəmov kimi təqdim etdi və ədəbsiz söyüşlərlə məni təhqir etməyə başladı. Söyüşlərdən sonra idarə rəisi mənə hədə-qorxu gəlməyə, təhqir etməyə, eləcə də ölümlə təhdid etməyə başladı. Onu ədəbli olmağa dəvət elədim, lakin bunun nəticəsi olmadı”, – deyə qeyd edən Ə. Zeynallı əlavə etdi ki, idarə rəisinin təhdid və təhqiri barədə dərhal 102 xidmətinə, DİN-nin mətbuat xidmətinə məlumat verib.
Məsələyə münasibət bildirməsi üçün yuxarıda göstərilən nömrə ilə əlaqə saxladıq. Telefona cavab verən Binəqədi Rayon Polis İdarəsinin rəisi Ağalar Məhərrəmov onun Əvəz Zeynallını təhqir və təhdid etmədiyini bildirdi.