Martın 25-dən 26-a keçən gecə naməlum şəxslərin fiziki hücumuna məruz qalan “Azadlıq” qəzetinin əməkdaşı Seymur Həziyev həkim müayinəsindən keçib. Həkimlər ona döş qəfəsinin yumşaq toxumalarının əzilməsi diaqnozunu qoyublar. Bu barədə bu gün (28 mart) Reportyorların Azadlıq və Təhlükəsizlik İnstitutuna (RATİ) S. Həziyevin özü məlumat verib.
Seymur Həziyev bildirdi ki, martın 26-da həkim müayinəsi zamanı döyülməsi ilə bağlı heç bir söz deməyib: “Əgər mənim hansı şəkildə döyülməyimi eşitsəydilər, mənə aldığım xəsarətlərə dair tibbi arayış verməzdilər.”
Xatırladaq ki, martın 25-dən 26-a keçən gecə saat 00.30 radələrində “Azadlıq” qəzetinin müxbiri Seymur Həziyevin yaşadığı Abşeron rayonunun Ceyranbatan qəsəbəsinin girişindən başına torba keçirilərək oğurlanılıb və naməlum ünvana aparılaraq işgəncəyə məruz qoyulduqdan sonra Binəqədi rayonu ərazisində küçəyə atılıb.