Həbsdə olan “Azadlıq” qəzetinin baş redaktoru Qənimət Zahidin (Zahidov) 1 saylı Bayıl İstintaq Təcridxanasında cəza çəkərkən yazmış olduğu kitabın əl yazmaları hələdə də ona qaytarılmayıb.
Bunu RATİ-yə jurnalistin həyat yoldaşı Ayəndə Mürsəliyeva dedi:
“Bu günlərdə Qənimət Bayıl İstintaq Təcridxanasının rəisi Misir Əliyevə əlyazmaların geri qaytarılması tələbi ilə yazılı müraciət edəcək. Əgər bundan sonra da əlyazmalar qaytarılmasa məsələ ilə bağlı məhkəməyə müraciət edəcəyik”, – deyə qeyd edən Mürsəliyeva artıq vəkil Rəşid Hacılının bu işlə bağlı sənədləri məhkəməyə hazırlamaqda olduğunu da dedi.
Xatırladaq ki, Azərbaycanın müasir tarixindən bəhs edən kitabın əlyazmalarını Bayıl İstintaq Təcridxanasının rəisi Misir Əliyev oxumaq adı ilə müəllifdən alıb. Daha sonra isə o, əlyazmaları geri qaytarmayaraq kitabın Heydər Əliyev və İlham Əliyevin əleyhinə yazıldığını iddia edib və əlyazmaların Ədliyyə Nazirliyi Məhkəmə Qərarları İcrası Baş İdarəsinə verdiyini söyləmişdi.