Bu gün prezident İlham Əliyev KİV-lərə birdəfəlik maliyyə yardımı göstərilməsi haqqında sərəncam imzalayıb.
Sərəncama əsasən Prezidentin ehtiyat fondunun vəsaiti hesabına 38 KİV-in hər birinə 5000 AZN (təxminən 6200 ABŞ dolları) məbləğində birdəfəlik maliyyə yardımı ediləcək.
Sərəncamda həmin KİV-lərin siyahısı verilib. Siyahının Azərbaycan dilində tam mətni ilə aşağıdakı ünvanda tanış ola bilərsiniz:
http://www.president.az/articles.php?item_id=20080731021600488&sec_id=30
RATİ ayrılmış yardıma ümumilikdə münasibətləri və bu vəsaitlə nə edəcəkləri ilə bağlı bir-neçə KİV rəhbərinə müraciət etdi. “Ayna” və “Zerkalo” qəzetlərinin baş redaktoru Elçin Şıxlı suala atalar sözü ilə qısa şəkildə cavab verdi: ”Bəy verən atın dişinə baxmazlar”.
“Turan” İnformasiya Agentliyinin direktoru Mehman Əliyev isə hələ pulla nə edəcəkləri haqqında dəqiq qərara gələ bilmədiklərini söylədi. “Fikirləşirəm ki, həmin pulu ehtiyacı olan jurnalistlərə versək pis olmaz. Belə də baxanda həmin pul o qədər də çox deyil ki, redaksiyanın hansısa problemini həll eləsən. Hər halda bu yaxşı addımdır. O pula heç olmasa 3-4 ədəd kompyuter də almaq olar”, – deyə qeyd edən M. Əliyev yardım alan KİV-lər sırasında müxalifət qəzetlərinin də adlarının olmasını təqdirəlayiq hal hesab etdi. Habelə M. Əliyev ümid etdi ki, prezidentin həbsdə olan jurnalistləri də əfv edəcək və mətbuatın durumunu normallaşması üçün ardıcıl addımlar atacaq.
“Bu yardım Azərbaycan dövlətinin sərvətləri hesabına əldə olunmuş pullardandır və Azərbaycan vətəndaşı olaraq həmin sərvətlərdə əldə olunan pullardan bizə də pay düşməlidir”. Bunu isə “Azadlıq” qəzetinin baş direktoru Azər Əhmədov söylədi. Habelə A. Əhmədov hesab etdi ki, bu yardımın əvəzinə həbs olunmuş jurnalistlərdən heç olmasa biri azadlığa buraxılsaydı və ya cəza müddəti yarıya endirilsəydi daha sevindirici hadisə olardı.
Baş direktor daha sonra bildirib ki, bu fərman imzalanarkən qəzetlərin nüfuzu və tirajı nəzərə alınmayıb. Onun sözlərinə görə, bu məbləğ hər hası bir həftəlik və ya aylıq dərc olunan qəzetlərin bir illik fəaliyyətinə bəs edər, lakin “Azadlıq” kimi gündəlik bir qəzetin bir həftəlik fəaliyyətinə belə bəs etmir.
”Azərbaycan” qəzetinin baş redaktoru, millət vəkili Bəxtiyar Sadıqov isə prezident İlham Əliyevin KİV-lərə ayırdığı yardımı Azərbaycanda söz və mətbuat azadlığının inkişafına qayğı kimi qiymətləndirdi: ” Heç bir ayrı seçkilik olmadan 5000 AZN müxalifət, iqtidar və eləcə də müstəqil qəzetlər arasında bölünəcək. Dövlət büdcəsindən ayrılan 5000 AZN mətbuatı mövcud çətinliklərdən çıxartmaq gücündə deyil. Amma bu məbləğ Azərbaycan mətbuatının maddi çətinlikdən çıxmasına qismən də olsa kömək edəcək”.
Mətbuat Şurasının sədri Əflatun Amaşov da prezidentin ayırdığı yardımı KİV-lərin inkişafına dövlət dəstəyi kimi dəyərləndirdi. Onun sözlərinə görə, 5 000 manat 22 iyul bayram münasibəti ilə mətbuatın inkişafına kömək etmək məqsədi ilə dövlət büdcəsindən ayrılıb.
Həbs olunmuş jurnalistlərlə bağlı prezidentə ünvanlanan müraciətin indiyə qədər cavabsız qalması məsələsinə də münasibət bildirən şura sədri tezliklə prezidentin bu məsələyə də müsbət baxacağına ümid etdi: ”Bu vaxta qədər biz Mətbuat Şurası olaraq prezident İlham Əliyevə çoxsaylı müraciətlər göndərmişik. Son dəfə isə həbsdə olan jurnalistlərlə bağlı müraciəti prezidentə ünvanlamışıq. Ancaq jurnalistləri əfv etmək və azadlığa buraxmaq bizim yox, dövlətin ixtiyarındadır”.