Yanvarın 7-də “Kür” Vətəndaş Cəmiyyəti Qərargahının əlaqələndiricisi Oqtay Gülalıyev və “Turan” İnformasiya Agentliyinin direktoru Mehman Əliyev Saatlı rayon Polis Şöbəsinin əməkdaşları tərəfindən saxlanılıblar.
Mehman Əliyev bildirib ki, hadisə 2010-cu ilin mayında baş vermiş daşqınlar zamanı zərərçəkən Novruzlu kəndi yaxınlığında baş verib. “Kəndin kənarında əhali ilə görüş zamanı gözlənilmədən polislər ora gəldilər və kobud şəkildə bizimlə davranaraq “siz cinayətkara oxşayırsınız” kimi təhqirlərlə qərargah üzvlərini zorla polisə aparmaq istədilər. Sabirabad Polis Şöbəsinin rəisi ilə 1 saat 30 dəqiqə danışıqdan sonra sərbəst buraxıldıq. Polis “Kür” qərargahının Sabirabad rayon mərkəzində qapalı zalda Kür çayının 2010-cu ildə daşması nəticəsində regionda ziyan çəkmiş insanların iştirakı ilə seminar keçirməsinə icazə vermədi”, – deyə qeyd edən M.Əliyevin sözlərinə görə, polislər tərəfindən qərargah fəalı Nəsrulla Nəsrullayevin videokamerası da sındırılıb.