“Trend” İnformasiya Agentliyinin dünən yaydığı məlumata görə MTRŞ prezidentliyə namizədlərin özəl telekanallarda təşviqat kampaniyası ilə bağlı yeni qaydalar tətbiq edəcək.
Məhərrəmli deyib ki, “özəl telekanallar Məcəllədə olan boşluqdan sui-istifadə edirlər. Mən hesab edirəm ki, namizədlər yalnız reklama verilən vaxtdan istifadə edə bilərlər. Bu Seçki Məcəlləsində öz əksini tapmalıdır. Prezident seçkisinə qədər bu məsələ həll olunmasa, Teleradio Şurası reklama qoyulan tələbləri əsas götürəcək. Belə olan halda namizədlər bir saatda 12 dəqiqədən artıq efir vaxtından istifadə edə bilməyəcəklər”.
Azərbaycan MSK-nın katibi Natiq Məmmədov “Trend”ə bildirib ki, dövlət mülkiyyətində olmayan özəl telekanal rəhbərləri prezidentliyə namizədlərə bərabər şəraitin yaradılmasında məsuliyyət daşımalıdır. Onun sözlərinə görə özəl telekanallar bütün namizədlərə eyni efir vaxtı ayırmalı və siyasi reklama görə eyni məbləğdə vəsait almalıdırlar. Məmmədov vurğulayıb ki, özəl telekanallarda prezidentliyə namizədlərin təşviqat kampaniyasının prinsipləri Seçki Məcəlləsində əksini tapmadığından, bu sahədə müəyyən boşluqlar yaranır. Məcəlləyə əsasən püşk atılır və bərabər vaxt ayrılır.