“Unikal” qəzetinin baş redaktoru Asəf Rzayev "Texnikabank"ASC -ni məhkəməyə verib. Bu barədə bu gün Reportyorların Azadlıq və Təhlükəsizlik İnstitutuna (RATİ) qəzetin baş redaktoru Asəf Rzayev məlumat verib.
Baş redaktorun sözlərinə görə, bir müddət əvvəl AMAY və "Texnikabank" ASC arasında yaranan problemlərlə əlaqədar olaraq, may ayının əvvəllərindən dövri mətbuatda kifayət qədər informasiyalar yayılmış, o cümlədən "Unikal" qəzetində də məqalələr dərc olunmuşdu. Bundan sonra "Texnikabank" ASC-nin rəhbərliyi Mətbuat Şurasına məktub ünvanlayaraq "Unikal"a qarşı bir sıra iddialar qaldırıb:
“Mətbuat Şurasının müşayiət məktubu ilə "Unikal" qəzetinə göndərilən həmin iddialar redaksiyada araşdırılıb və məlum olub ki, bank rəhbərliyinin şikayət ərizəsində qəzetin baş redaktoruna və kollektivinə qarşı açıq təhqirlərə yol verilib. Məhz bundan sonra "Unikal" qəzeti "Texnikabank" ASC-ni məhkəməyə vermək qərarına gəlib və Nərimanov rayon Məhkəməsinə iddia ərizəsi ilə müraciət etmək qərarına gəlib” deyə A. Rzayev bildirdi.