NOVRUZƏLİ MƏMMƏDOVUN SƏHHƏTİ AĞIRLAŞIB

iyul 27th, 2009
“Tolışi Sədo” (“Talışın Səsi”) qəzetinin həbsdə olan baş redaktoru  Novruzəli Məmmədovun səhhəti ağırlaşıb. Bu barədə Reportyorların Azadlıq və Təhlükəsizlik İnstitutuna baş redaktorun Hüquqlarının Müdafiə Komitəsindən məlumat daxil olub.

Məlumatda bildiruilir ki, bir ay əvvəl onun eyni zamanda 3 cərrahiyyə əməlliyatına  – katarakta, qalxanvarı və prostat vəzilərinin əməliyyatına ehtiyacı  olduğu, yüksək qan təzyiqindən  əziyyət çəkdiyi bildirilirdisə, bu gün səhhətində daha ağır bir xəstəlik – yayılmış osteoxondroz, güclü  ağrı və hərəkət məhdudluğu ilə ifadə olunmuş sağ mil sinirinin nevriti aşkara çıxmışdır. Hələ də tibb məntəqəsində yerləşdirilməyən Novruzəli Məmmədovla növbəti görüşünü keçirdən vəkili Ramiz Məmmədov, həyat yoldaşı Məryəm Məmmədova və oğlu Emil Məmmədov müdafiə komitəsinə bildiriblər ki, onun sağ əli  işləmir, əvvəlki xəstəlikləri isə kəskin dərəcədə ağırlaşmışdır.
Xatırladaq ki, “Tolışi Sədo” (“Talışın Səsi”) Novruzəli Məmmədovun Azərbaycan Respublikası CM-nin 274 (“Dövlətə Xəyanət”) maddəsiylə 10 il azadlıqdan məhrum edilib və hazırda 15 saylı ciddi rejimli cəzaçəkmə müəssisəsində saxlanılır.