Qeyd edək ki, martın 17-də saat 12.30 radələrində ev telefonuna zəng edən naməlum şəxs E.Fətullayevin atasına “oğlun da, sən də çox danışmayın, yoxsa pis olar, haminizi təhlükə gözləyir, sizi məhv edəcəyik” deyərək, ölümlə təhdid edib. Bundan bir neçə gün öncə baş redaktor “Monitor” jurnalının baş redaktoru Elmar Hüseynovun qətlində MTN zabiti Akif Çovdarovun əlinin olması ilə bağlı bəyanat vermişdi.
Martın 17-də Jurnalistləri Müdafiə Komitəsi (JMK) Eynulla Fətullayevin ailəsinin ölümlə hədələnməsi ilə bağlı bəyanat vermişdi. Bəyanatda JMK Azərbaycan hökumətini həbsdə olan jurnalist 2009-cu il Beynəlxalq Mətbuat azadlığı Mükafatı laureatı Eynulla Fətullayevə və onun ailəsinə qarşı ölüm hədəsini dərindən araşdırmaga çağırmışdı.
Xatırladaq ki, Eynulla Fətullayev 2007-ci ilin aprelin 21-də böhtan və təhqirdə ittiham olunaraq 2 il 6 ay müddətində azadlıqdan məhrum edilib. Sonradan baş redaktor terrorla hədələmə, etnik və dini düşmənçiliyin salınması, vergidən yayınma ittihamları ilə təqsirli bilinib və 2007-ci il oktyabrın 30-da əvvəlki həbs müddəti də daxil olmaqla ümumilikdə, 8 il 6 ay müddətinə azadlıqdan məhrumetmə cəzası verilib. Baş redaktor cəzasını 12 saylı cəzaçəkmə müəssisəsində çəkirdi. 29 dekabr 2009-cu ildə Fətullayevin üzərindən 0,223 qram heroin tapılıb. Eynulla Fətullayev və onun vəkili bu hadisəni yaxın zamanlarda jurnalistin həbsi ilə bağlı öz qərarını verəcək Avropa İnsan Haqları Məhkəməsinin qarşısını almaq məqsədilə əvvəlcədən qurulmuş əməliyyat kimi qiymətləndirir. Qaradağ Rayon Polis İdarəsinin İstintaq Şöbəsində barəsində Cinayət Məcəlləsinin 234.1 (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddəsi ilə cinayət işi açılan Eynulla Fətullayev yanvarın 2-də 2 saylı Bakı İstintaq Təcridxanasına köçürülüb.
2005-ci ildən Eynulla Fətullayevin təsisçiliyi və baş redaktorluğu ilə “Realnıy Azerbaydjan” qəzeti həftəlik, “Gündəlik Azərbaycan” qəzeti isə gündəlik nəşr olunub. 2007-ci ildə baş redaktorun həbsindən sonra hər iki qəzet fəaliyyətini dayandırıb.