Ş. Çobanoğlu baş redaktorun qondarma ittihamlarla həbs edilməsi və qəzetlərin bağlanması ilə bağlı hadisələri bir daha xatırlatdı: “Baş redaktorun həbsi ilə qəzetin bağlanmasına nail ola bilməsələr də, bizə qarşı müxtəlif təxribat xarakterli addımlar atdılar, bizi qorxutmağa, hər tərəfdən sıxmağa başladılar. Son məqamda isə MTN-də yeni bir qondarma iş açmaqla əmlakımızı müsadirə etdilər və bununla da biz qəzetin fəaliyyətini dayandırmağa məcbur olduq”, – deyə qeyd edən Ş.Çobanoğluya görə, Eynulla Fətullayevin həbsi və qəzetlərin bağlanması prezident İlham Əliyevin istəyi ilə həyata keçirilmişdir.
Onun sözlərinə görə, əks təqdirdə hər iki qəzet bu gün də fəaliyyətini davam etdirərdi və bunun üçün maddi, mənəvi və texniki imkanlar da var idi. Ş. Çobanoğlu qəzetlərin ayrı-ayrı hesablarda azı 100 000 AZN həcmində vəsaitinə də həbs qoyulduğunu dedi.
Döyülməsi ilə bağlı açılmış və icrası dayandırılmış cinayət işi haqqında məlumat verən Ü. Cəfərov isə bu faktla bağlı ötən ilin iyununda çıxarılan qərarı Yasamal Rayon Polis İdarəsi İstintaq Şöbəsindən nəhayət 10 gün bundan əvvəl aldığını bildirib.
Durmadan hədələr və təzyiqlərlə üzləşdiyini bildirən hərbi jurnalist hətta 2008-ci il ərzində öldürülə biləcəyini də dedi. Onun sözlərinə görə, cinayət işinin dayandırılması ilə əlaqədar artıq Avropa İnsan Haqları Məhkəməsinə sənədlər hazırlanır. Media Hüquq İnstitutunun rəhbəri Rəşid Hacılı və vəkil Elçin Sadıqov bu sənədləri hazırlayır. Sənəddə Avropa İnsan Haqları Konvensiyanın 6, 8 və 13-cü maddələrinin pozulduğu qeyd olunacaq.
Tədbirdə iştirak edən “Turan” İnformasiya Agentliyini rəhbəri Mehman Əliyev isə çıxışında həqiqətən də 2008-ci ilin jurnalistlər üçün ağır olacağını dedi və o bu fikrini qarşıdan gələn prezident seçkiləri ilə bağladı.