Milli Televiziya və Radio Şurasının sədri Nuşirəvan Məhəhrrəmli APA-ya bildirib ki, “Rusiya və Azərbaycan teleradio yayımçılarının qarşılıqlı yayımı ilə bağlı müzakirələr artıq aparılmır.
Vaxtilə Azərbaycanda “RTR-Planeta” kanalının yayımlandığı tezliyin müsabiqəyə çıxarılması üçün gələcəkdə müzakirələr aparılacaq”. Tezlik boşalan kimi yeni kanal açmaq fikrində olmadıqlarını vurğulayan sədr əlavə edib ki, “regional televiziya kanalının açılması haqqında fikirləşirik. Növbəti parlament seçkilərinə qədər Azərbaycanın əsas bölgələrində televiziya kanalları açılacaq”. Məhərrəmlinin sözlərinə görə, Azərbaycanda yeni idman kanalının açılacağı da gözlənilir: “Azərbaycanda idmanla bağlı çox böyük işlər görülür. Biz də televiziya sahəsində bu işlərə dəstək vermək üçün belə bir kanalın açılması haqqında düşünürük. Artıq bu yöndə müzakirələrə başlanılacaq”.
Şuranın sədri onu əlavə edib ki, artıq yaxın günlərdə Azərbaycanda yeni radio fəaliyyətə başlayacaq. Yeni radio üçün “Xəzər” televiziya kanalına 103 FM-də tezlik ayrılıb.