Söz azadlığı və insan haqlarının müdafiəsi ilə bağlı keçirilməli olan mitinqin təşkilat komitəsinin rəhbəri Eldar Namazov bu gün Beynəlxalq Mətbuat Mərkəzində mətbuat konfransı keçirib.
Namazov bildirib ki, bu gün (25 dekabr) Mitinq Komitəsi adından Bakı Şəhər İcra Hakimiyyətinə məktub göndərilib. Məktubda göstərilir ki, Komitənin Ukrayna meydanında mitinq keçirməsində israrlı olmasının əsasında Bakı şəhər icra başçısının 27 oktyabr 2006-cı il tarixli 318 saylı sərəncamı ilə həmin yerin mitinqlər üçün ayrılması durur. Məktubda 10 gün müddətində mitinqin Ukrayna meydanında keçirilməsinə icazə verilməməsinin səbəblərinin bildirilməsi tələb edilir.
Xatırladaq ki, Mitinq Komitəsi dekabrın 8-də Ukrayna meydanında mitinqin keçirilməsi ilə əlaqədar Bakı Şəhər İcra Hakimiyyətinə müraciət etmişdi. Icra Hakimiyyəti heç bir səbəb göstərmədən mitinqin Ukrayna meydanında deyil, “Bibiheybət” stadionunda keçiriməsinə icazə vermişdi. Təşkilat Komitəsi həmin stadionda olmuş və orada mitinqin keçirilməsi üçün şəraitin olmadığını əsas tutaraq, yenidən dekabrın 22-də mitinqin Ukrayna meydanında keçirilməsi ilə bağlı müraciət etmişdi. Bakı Şəhər İcra Hakimiyyəti yenidən heç bir səbəb göstərmədən mitinqin Ukrayna meydanında keçirilməsinə icazə verməmişdi.