FOTOAPARATI SINDIRILAN MÜXBİRLƏ BAĞLI HÜQUQ MÜHAFİZƏ ORQANLARINA MÜRACİƏT EDİLƏCƏK

dekabr 1st, 2010
 “Bizim yol” qəzetinin əməkdaşı Ramid İbrahimov noyabrın 26-da  Bakı Şəhər İcra Hakimiyyətinin (BŞİH)  əməkdaşı tərəfindən fiziki hücuma məruz qalması ilə əlaqədar  Media Hüququ İnstitutuna (MHİ) müraciət edib.  Bu barədə bu gün (01 dekabr)  Reportyorların Azadlıq və Təhlükəsizlik İnstitutuna  (RATİ) Ramid İbrahimovun özü məlumat verib.

R. İbrahimov bildirdi ki, MHİ faktla bağlı  hüquq mühafizə orqanlarına müraciət edərək, hadisənin araşdırılmasına çalışacaq.

Xatırladaq ki, “Bizim yol” qəzetinin əməkdaşı Ramid İbrahimov  noyabrın 26-da  “Qış parkı”  layihəsi əsasında  Bakı şəhəri, Əlimərdan bəy Topçubaşov küçəsi 73 ünvanında evlərin  sökülməsi ilə  əlaqədar foto  çəkiliş apararkən,  BŞİH –nin əməkdaşlarının fiziki hücumuna məruz qalmışdı və nəticədə jurnalistin fotoaparatı sındırılmışdır.

Qeyd edək ki, “Bizim yol” qəzeti 2003-cü ildən çap olunur və gündəlik qəzet kimi fəaliyyət göstərir.