İyunun 3-də Türkiyədə Gezi parkının sökülməsinə etiraz olaraq keçirilən aksiyaya dəstək məqsədilə gənclərin Bakıda keçirdiyi aksiyanı işıqlandıran Reportyorların Azadlıq və Təhlükəsizlik İnstitutunun əməkdaşı Rasim Əliyevi döyən Səbail Rayon Polis İdarəsinin Post Patrul Xidməti Bölməsinin polis nəfəri, polis baş serjantı Mais Əliyev və eyni zamanda aksiya iştirakçısına fiziki güc tətbiq etmiş polis serjantı Zahid Daşdəmirov Bakı Şəhər Baş Polis İdarəsinin müvafiq əmri ilə tutduqları vəzifədən azad olunublar və polislər barəsində prosessual qərar qəbul edilməsi üçün iş materialları prokurorluğa göndərilib. Bu barədə Bakı Şəhər Polis İdarəsindən bu gün (13 iyun) tarixində RATİ-yə göndərilən məktubda qeyd edilib.
Məsələ ilə bağlı təzyiqə məruz qalmış jurnalist Rasim Əliyev RATİ-yə bildirib ki, məni döyən polisin işdən çıxarılmasını müsbət hal kimi qeyd etmək olar, ancaq düşünürəm ki, prokurorluqda məni heç bir əsas olmadan döyən polis əməkdaşı barəsində cinayət işi açılmalı və o cinayət məsuliyyətinə cəlb edilməlidir.
Xatırladaq ki, iyunun 3-də Türkiyənin “Qalatasaray” və “Fənərbaxça” futbol komandalarının fanklublarının üzvləri mayın 28-dən etibarən İstanbulda Taksim meydanın arxasındakı Gəzi parkında ağacların kəsilməsinə etiraz edən milyonlarla insanın etiraz aksiyasına dəstək xarakteri daşıyan aksiya keçiriblər. Bu zaman aksiyanı işıqlandıran jurnalist, RATİ əməkdaşı Rasim Əliyev Səbail Rayon Post Patrul Xidmətinin əməkdaşları tərəfindən zorakılığa məruz qalıb.