Misirin Azərbaycandakı səfirliyinin qarşısında şəkil çəkən zaman polislər “Yeni Müsavat” qəzetinin müxbiri Elmin Bədəlovu saxlayıblar. Bu barədə bu gün (01 fevral) RATİ-yə Elmin Bədəlovun özü məlumat verib.
Elmin Bədəlov bildirdi ki, Türkiyədəki Misir Səfirliyinin qarşısında prezident Hüsnü Mübarəkin şəklini yandırıblar, digər ölkələrdəki Misir səfirliyinin qarşısında aksiyalar keçiriblər və o da Azərbaycanda olan Misir səfirliyinin qarşısında nələrinsə baş verə biləcəyini zənn edərək əraziyə gedib. Amma hər hansı bir hadisə ilə rastlaşmadığı üçün sadəcə səfirlik binasının şəklini çəkib.
“Şəkil çəkən zaman polis əməkdaşları məni saxladılar və məni Nəsimi rayon Polis İdarəsinə gətirdilər. Şəxsiyyət və jurnalist vəsiqəmin surətini çıxardılar. Bölmədə mənə bildirdilər ki, mən səfirliyin şəklini çəkə bilmərəm və bu qadağandır. Misir səfirliyinin isə şəklini heç çəkə bilmərəm. Çəkdiyim şəkilləri sildilər və mənə bildirdilər ki, əgər bir də səfirliyin şəklini çəksən səni pis cəza gözləyir. Səfirliyin şəklini çəkməyin hansı qanunla qadağan edildiyini soruşanda onlar mənə hansısa bir qanun göstərmədilər ” – deyə Elmin Bədəlov bildirdi.