Noyabrın 7-də “Bizim Yol” qəzetinin yayım şöbəsinin əməkdaşı Vüsal Yusubova fiziki hücum edən şəxslərdən biri saxlanılıb. Bu barədə bizimyolinfo.com saytı məlumat yayıb.
Məlumatda qeyd olunur ki, sözügedən qəzetin əməkdaşına hücum edən şəxslərdən biri 1977-ci il təvəllüdlü İsgəndərov Anar Elxan oğlu hazırda Yasamal rayon Polis İdarəsinin 28-ci Polis Bölməsində saxlanılır. Ona qarşı Cinayət Məcəlləsinin (CM) 221-ci maddəsi (xuliqanlıq) ilə cinayət işi açılıb, araşdırma davam edir. Polis hadisədə iştirakçı olan başqa şəxslərin də axtarışını davam etdirir. Xatırladaq ki, 7 noyabr 2012-ci il tarixdə “Bizim Yol” qəzetinin yayım şöbəsinin əməkdaşı Vüsal Yusubov idmançı görkəmli 3-4 nəfər naməlum şəxslərin fiziki hücumuna məruz qalıb. Hadisə gecə saat 03:20 radələrində Şərifzadə küçəsi 3 ünvanında o “Futbol+” mətbəəsindən çıxarkən baş verib. Həmin şəxslər V. Yusubova hücum edərək, ona yumruq zərbələri ilə döyərək, müxtəlif bədən xəsarətləri yetiriblər.
“Bizim yol” qəzetinin baş redaktoru Bahəddin Həziyevin verdiyi məlumata görə, bir gün sonra həmin şəxs azadlığa buraxılıb.
Qeyd edək ki, qəzetin 6 noyabr 2012 il tarixli sayında “Dünya çempionunun adı dələduzluq olayında" başlıqlı məqalədə 2010-cu ilin mayında Bakıda keçirilən dünya birinciliyində 48 kiloqramlıq çəki dərəcəsində qızıl medal qazanmış Salman Əlizadənin adı fırıldaqçılıq etdiyi iddaa olunan şəxslə bağlı çəkilib. Bundan sonra adı çəkilən idmançının atası redaksiyaya zəng edərək hədə-qorxu gəlib. Hazırda bu versiya üzərində araşdırma aparılır.