Bu gün (19 dekabr) Sülh və Demokratiya İnstitutunun təşəbüsü ilə Reportyorların Azadlıq və Təhlükəsizlik İnstitutunun (RATİ) mətbuat mərkəzində hakim Yeni Azərbaycan Partiyasının bir şəxsin yalnız iki dəfə prezident seçilə bilməsi haqda konstitusion məhdudiyyətin ləğv edilməsi üçün referendum keçirilməsi təklifinə həsr olunmuş müzakirə keçirildi.
Sülh və Demokratiya İnstitutunun direktoru Leyla Yunus 15 oktyabr 2008-ci il prezident seçkilərindən çox az müddət keçəndən sonra Azərbaycanda iqtidar partiyasının belə bir təklifi irəli sürəcəyini gözləmədiklərini bildirdi. Onun fikrincə təklif olunan dəyişikliklərdə məqsəd artıq iki dəfə prezident seşilmiş İlham Əliyevin 2013-cü ildə yenidən prezident olmasına bəri başdan şərait yaratmaqdır.
Azərbaycan Demokrat Partiyasının sədri Sərdar Cəlaloğlu müzakirə mövzusu olan məslənin Azərbaycanın demokratik imicinə ciddi zərbə vuracağını dedi: "Konstitusiya cəmiyyətin fundamental bir məsələsidir. Azərbaycan Özbəkistan və Qazaxıstanın başlanğıc nöqtəsinə doğru hərəkət edir. Partiyalar dövlətin diqtəsi ilə məsələləri müzakirəyə çıxarır. Bu artıq totalitarizmdir. Yeni Azərbaycan Partiyasının Konstitusiyada dəyişiklik edərək prezidentin iki dəfədən artıq hakimiyyətdə saxlamaq istəyi Azərbaycanda totalitar rejimin yaradılmasının birinci mərhələsidir ".
Azərbaycan Xalq Cəbhəsi Partiyasının sədri Əli Kərimli isə bildirdi ki, Konsyitusiyaya təkilif olunan əlavə və dəyişikliklər Azərbaycan dövlətçiliyi üçün real təhlükədən xəbər verir: "Demokratik ölkələrdə Konstitusiya da, qanunlar da dəyişə və təkminləşə bilər. Amma bu gün bizə dəyişdirilməsi təklif etdikləri məsələ demokratiyanın əsas fundamental prinsipinə zərbədir. Ona görə də Azərbaycan cəmiyyəti buna etiraz etməlidir".
Müsavat Partiyasının başqanı İsa Qəmbər də bir şəxsin iki dəfədən artıq prezident seçilməsinin əleyhinə olduğunu qeyd etdi: "Hakimiyyət açıq-aydın bu məsələdə tələsir. Bu isə iqtidarın partiyalı sistemin inkişafına, hakimiyyətin seçkilər yolu ilə dəyişdirliməsinə ciddi maneə yaratmaq istəyindən xəbər verir".
Habelə müzakirələrdə Vətəndaş və İnkişaf Partiyasının sədri Əli Əliyev, Müsavat Partiyası başqanın müavini Arif Hacılı və Azərbaycan Liberal Partiyasının sədr müavini Əvəz Temirxan da çıxış edərək Konstitusiyaya təkif olunan əlavə və dəyişikliklərin əleyhinə olduqlarını bildirdilər.
Tədbirin sonunda isə Müsavat Partiyası başqanı İsa Qəmbər və digər siyasətçilər Reportyorların Azadlıq və Təhlükəsizlik İnstitutunun (RATİ) mətbuat mərkəzində tədbirin keçirilməsinə şərait yaratdıqları üçün, təşkilatın rəhbərliyinə təşəkkür etdilər. İ.Qəmbərin sözlərinə görə, mövzu ilə bağlı tədbir keçirmək üçün bir neçə mətbuat klubuna müraciət edilsə də, müxtəliuf bəhanələrlə onlara yer verməkdən imtina edilib.