Ramanada yerləşən 16 saylı cəzaçəkmə müəssisəsində saxlanılan vicdan məhbusları Arif Hacılı, Müsavat Partiyası fəalı Ülvi Quliyevlə AXCP fəalı Babək Həsənov müstəqil və müxalifət qəzetlərini oxumaqdan məhrum ediliblər.
Bu barədə “Yeni Müsavat” qəzetinə açıqlama verən Penitensiar Xidmətin sabiq rəisi Məmməd Zeynalov məhkumlara yaxınları tərəfindən hər hansı bir qəzetin aparılmasına qanunda heç bir qadağa və məhdudiyyətin olmadığını deyib: “Cəzaçəkmə müəssisələrində kitabxanalar olur və ora gündəlik qəzetlər aparılır. Amma çox güman ki, ora Arif bəyin oxumaq istədiyi qəzetlər aparılmır. Lakin Arif bəyin və digər məhkumların yaxınları istənilən müstəqil qəzeti, jurnalı, kitabı ora apara bilərlər. Bu heç bir qanunla qadağan edilmir. Əgər buna icazə verilmirsə, bu, qanunsuzluqdur”.
Penitensiar Xidmətinin ictimaiyyətlə əlaqə şöbəsinin rəisi Mehman Sadıqov isə bildirib ki, cəzaçəkmə müəssisəsinin əməkdaşlarının Arif Hacılıya qəzetlərin verilməsinin qarşısını almalarına inanmadığını deyib: “Məhkumlar ölkədə çap olunan və qadağan olunmayan qəzetlərə abunə ola bilərlər. Cəzaçəkmə müəssisəsinin özü də kifayət qədər qəzetlərə abunə yazılıb. Əgər cəzaçəkmə müəssisəsi hansısa qəzetə abunə yazılmayıbsa, məhkumun özünün, onun yaxınlarının ixtiyarı var ki, həmin qəzetlərə abunə yazılsın və oxusun”.