Bu gün Bakı Apellyasiya Məhkəməsinin hakimi Abdin Abdinbəyovun sədrliyi ilə “Gündəlik Azərbaycan” və “Realny Azerbaydjan” qəzetlərinin baş redaktoru Eynulla Fətullayevin həbsi ilə bağlı verilən şikayət üzrə məhkəmə hazırlıq iclası keçirilib.
E.Fətullayevin vəkili İsaxan Aşurov çıxışında E.Fətullayevə bəraət verilməsini tələb etdi: ”Bu məkəmə prosesi Avropa məhkəməsinə gedib çıxarsa, Azərbaycan üçün çox böyük biabırçılıq olacaq.”
Hakimin İ.Aşurova verdiyi “E.Fətullayevin məhkəməyə gətirilməsini istəyirsinizmi?” sualına cavab olaraq vəkil bildirdi ki, “məhkum bizim xahişimiz olmadan da məhkəməyə gətirilməlidir: Düzdür Azərbaycan qanunvericiliyində belə bir qanun olmasa da, 2002-ci ildə biz Avropa konvensiyasını qəbul etmişik. Bu konvensiyaya görə E.Fətullayev istənilən halda məhkəməyə gətirilməlidir”.
Bundan sonra hakim bildirdi ki, iş icraata götürüldü və məhkəmə prosesini dekabrın 28-i saat 10:00-a təyin etdi.