Bu gün (17 oktyabr) Bakı Apellyasiya Məhkəməsində hakim Mirzə Tağızadənin sədrliyi ilə “Azadlıq” qəzetinin həbsdə olan baş redaktoru Qənimət Zahidin (Zahidov) 1 saylı Bayıl İstintaq Təcridxanasında saxlanıldığı zaman müasir Azərbaycan tarixinə dair yazdığı kitabının əlyazmalarının qanunsuz olaraq təcridxana rəhbərliyi tərəfindən müsadirə edilməsi və məhv edilməsinə görə vermiş olduğu şikayətlə bağlı Səbail rayon Məhkəməsinin 06.10.08-ci il tarixində çıxardığı qərardan verdiyi apellyasiya şikayəti üzrə məhkəmə prosesinə hazırlıq iclası keçirilib.
Prosesdə Q.Zahidin maraqlarını vəkili Elçin Sadıqov müdafiə edib. Amma cavabdeh – 1 saylı Bayıl İstintaq Təcridxanasının nümayəndəsinin hazırlıq iclasında iştirak etmədiyinə görə hakim hazırlıq iclasını dekabrın 29-u saat 11.30-a qədər təxirə salıb.
Qeyd edək ki, Səbail rayon Məhkəməsinin hakimi Famil Nəsibovun sədrliyi ilə bu məsələ üzrə keçirilən prosesdə heç bir əsas göstərilmədən iddia təmin edilməmişdi.
Xatırladaq ki, Q.Zahid 1 saylı Bayıl İstintaq Təcridxanasında yazdığı kitabın əlyazmaları təcridxananın rəisi Misir Əliyev tərəfindən oxumaq adı ilə baş redaktordan alınmışdı. Lakin sonradan M.Əliyev əlyazmalarda Azərbaycan dövlətinin, eks-prezident Heydər Əliyevin və hazırkı prezident İlham Əliyevin əleyhinə məlumatların əks olduğunu əsas gətirərək əlyazmaların məhv edildiyini bildirib. Bu səbəbdən də Q.Zahid əlyazmaların müsadirə edilməsinin qanunsuz elan edilməsi tələbi ilə məhkəməyə müraciət edib.