İyulun 16-də “Ataxan Dəmir Sənaye” Türkiyə-Azərbaycan birgə müəssisəsinə iki gün əvvəl mülki geyimli bir qrup şəxsin hücumu ilə bağlı araşdırma aparan “Azadlıq” radiosunun əməkdaşı da hücuma məruz qalıb.
“Azadlıq” radiosunun məlumatına görə, hadisə yerində olan jurnalist Nüşabə Fətullayevanın kamerası və telefonunu zorla bir qrup mülki geyimli tərəfindən əlindən alınıb. Yalnız polisə müraciət edildikdən sonra avadanlıq geri qaytarılıb. Amma kameranın yaddaş kartı cihazın içində olmayıb.
Jurnalist bildirib ki, naməlum şəxslər yuxarıda adı çəkilən müəssisənin texnikasını və istehsal etdiyi məhsulları zəbt edir, daşıyırlar. Çəkiliş aparmaq istəyən jurnalist də zorakılıqla üzləşib
Belə ki, iyulun 14-dən “Ataxan Dəmir Sənaye” Türkiyə-Azərbaycan birgə müəssisəsinə naməlum şəxslər basqın etməyə başlayıblar. Bu haqda “Azadlıq” radiosuna müəssisənin payçılarından biri, sabiq deputat Nazim Məmmədov məlumat verib: «Hücum edənlər mülki geyimdə olublar. Onlar müəssisə rəhbərliyindən işi dayandırmağı tələb ediblər. Həmin şəxslər özlərini “Baku Steel Company”nin sahibi Rasim Məmmədovun adamları kimi təqdim ediblər”.