RATİ əməkdaşı Rəsul Cəfərov sessiyada iştirakına maddi və texniki kömək etdiyinə görə Açıq Cəmiyyət İnstitutu Yardım Fonduna və İnsan Haqları Evinin Cenevrə ofisinə təşəkkür etdiyini bildirdi. O qeyd etdi ki, Azərbaycan hökuməti tərəfindən təqdim edilən 3-cü dövrü hesabat əsas məsələləri tam əhatə etmirdi. Buna görə də hökumətin təqdim etdiyi hesabatla bağlı xeyli suallar yarandı. Belə ki, hökumət nümayəndələrinə işgəncə faktları ilə bağlı hər hansı polis işçisinin cəzalandırılmaması, gənc bloqçuların tibbi yardım almaması, “Tolışi Sədo” qəzetinin mərhum baş redaktoru Novruzəli Məmmədova tibbi yardım göstərilməməsi və buna görə də onun həbsxanada ölməsi, Faina Kunqurovanın ölümü ilə bağlı verilən suallar cavabsız qaldı. Ombudsman İnstitutunun fəaliyyəti ilə bağlı suallar da tam cavablandırılmadı.
Rəsul Cəfərov qeyd etdi ki, bütün bunlar Azərbaycanla bağlı ciddi tövsiyələrin verilməsi və qərarların qəbul olunması ilə nəticələnəcək.
Sessiyada iştirak edən Demokratik Təsisatlar və İnsan Haqları təşkilatının rəhbəri Elçin Abdullayev isə bəzi Vətəndaş Cəmiyyəti nümayəndələrinin Azərbaycanla bağlı hazırladıqları alternativ hesabatda həqiqətlərin əks olunmadığını bildirdi.