JURNALİST ŞAHİN AĞABƏYLİNİN ÖLÜM FAKTI İLƏ BAĞLI EKSPERTİZANIN NƏTİCƏLƏRİ AÇIQLANIB

yanvar 27th, 2011
2010-cu il, oktyabrın 27-də Qaradağ rayonu ərazisində baş vermiş avtomobil qəzası nəticəsində  “Poliqon” informasiya agentliyinin və “Milli Yol” qəzetinin vəfat etmiş redaktoru Şahin Ağabəylinin ölüm faktı  ilə bağlı aparılmış avtotexniki ekspertizanın nəticəsi məlum olub. Bu barədə bu gün (27 yanvar) Reportyorların Azadlıq və Təhlükəsizlik İnstitutuna (RATİ) Baş Dövlət Yol Polisi İdarəsinin istintaq və təhqiqat şöbəsinin müstəntiqi Vaqif Nəcəfov məlumat verib.

Onun sözlərinə görə, ekspertiza nəticəsində  qəzanın  avtomobili idarə edən Aqil Ələsgərlinin səhvindən baş verdiyi təsdiqlənib: “Ekspertiza nəticəsində baş verən qəzada Aqil Ələsgərli ağır xəsarət aldığı və hal-hazırda da yataq xəstəsi olduğuna görə tibb ekspertizası onun sərbəst şəkildə məhkəmə qarşısına çıxmaq imkanı olmadığını göstərib. Bundan da belə nəticəyə gəlinir ki,  təqsirləndirilən şəxs sərbəst şəkildə hakim qarşısına çıxa bilmədikdə, iş qeyri-müəyyən müddətə uzadılır”.

Habelə qeyd edək ki, bu gün Şahin Ağabəylinin doğum günü ilə əlaqədar olaraq dostları və jurnalist həmkarları “Ümid” Partiyasının qərargahında mərhum jurnalistin anım günü ilə bağlı toplantı keçirdilər. Toplantıda  Ağabəylinin yaxın dostları, həmkarları onunla bağlı düşüncələrini və xatirələrini tədbir iştirakçıları ilə bölüşdülər. “Xural” qəzetinin baş redaktoru Əvəz Zeynallı, “Azadlıq” qəzetinin baş redaktoru Qənimət Zahid, yaxın dostu Anar Gəraylı və digərləri mərhum barəsində ən xoş xatirələrini yada salaraq, onun ölümünü mətbuat üçün böyük itki hesab elədiklərini qeyd elədilər. Tədbir iştirakçıları sonda Ş. Ağabəylinin ailəsinə hərtərəfli dəstək olmaq və evlə təmin edilməsi üçün müvafiq tədbirlərin görülməli olduğunun vacibliyini vurğuladılar.

Xatırladaq ki, oktyabrın 27-də səhər saatlarında Bakı – Qazax  yolu istiqamətində hərəkət edən içərisində “Poliqon” informasiya agentliyinin rəhbəri və “Milli Yol” qəzetinin redaktoru Şahin Ağabəylinin olduğu və jurnalist Aqil Ələsgərin idarə etdiyi “Nissan Tiida” markalı  90 FJ 524 dövlət nömrə nişanlı avtomobil hərəkət istiqamətini itirərək aşmış və nəticədə Şahin Ağabəyli dünyasını dəyişmişdir. Faktla bağlı Cinayət Məcəlləsinin (CM) 263.2-ci maddəsi   (Eyni əməllər ehtiyatsızlıqdan zərərçəkmiş şəxsin ölümünə səbəb olduqda) ilə cinayət işi başlanıb.