Bu gün (27 yanvar) Bakı Apellyasiya Məhkəməsində hakim Cəmilə Səfiyevanın sədrliyi ilə “Milli Birlik Hərəkatı”nın lideri Lalə Şövkət Hacıyevanın “Ölkə” qəzetinə qarşı iddiasına əsasən “Ölkə” qəzetinin Yasamal rayon Məhkəməsinin çıxardığı qərardan verdiyi apellyasiya şikayəti üzrə məhkəmə prosesi keçirilib.
İclasda “Ölkə” qəzetinin baş redaktoru Rəfael Becanov, qəzetin vəkili Azər Rəsulov və iddiaçının nümayəndəsi Əvəz Temirxan iştirak ediblər.
Baş redaktor bildirdi ki, hakim tərəflər arasında ümumi razılığa gəlinməsi barədə ötən məhkəmə prosesi zamanı etdiyi təklifi bir daha təkrarlayıb və növbəti prosesi 4 fevral saat 15:00-a təyin edib.
Xatırladaq ki, “Milli Birlik Hərəkatı”nın lideri Lalə Şövkət Hacıyeva “Ölkə” qəzetinin 11-17 fevral tarixli buraxılışında “”Madam” ləqəbli agent kimdir?” başlıqlı yazısında barəsində həqiqətə uyğun olmayan məlumatların yer aldığını iddia edərək, cavabdehlərin təkzib verməsini, üzr istəməsini və onlardan hər birinin 100 min manat məbləğində cərimələnməsini tələb edib. İddia ərizəsində göstərilib ki, cavabdehlərdən məhkəmə qərarı ilə tutulacaq bütün məbləğ Bilgəh qəsəbəsindəki müharibə və əmək əlilləri üçün pansionatın hesabına köçürülsün. 13 sentyabr 2010-cu ildə Yasamal rayon Məhkəməsi qəzetə qarşı iddianı təmin edərək, 4 000 (min) manat cərimələnməsi barədə qərar verib.
Qeyd edək ki, “Ölkə” qəzeti 2008-ci ilin fevral ayında fəaliyyətə başlayıb və həftədə bir dəfə dərc olunur.