Bu gün (13 may) Reportyorların Azadlıq və Təhlükəsizlik İnstitutunun mətbuat mərkəzində Naxçıvan Muxtar Respublikasında insan hüquqlarının vəziyyətinə dair dəyirmi masa keçirildi.
Jurnalistlərin sözlərinə görə, insanların sərbəst hərəkət etmək, sərbəst toplaşmaq, mülkiyyət, məlumat azadlığı, habelə seçib-seçilmək hüquqları Muxtar Respublika rəhbərliyi tərəfindən mütəmadi olaraq kobud şəkildə pozulur. Bölgədə müxalifət düşüncəli insanların yaşaması və işləməsinə imkan vermir. Müstəqil jurnalistlər, onların ailələri və qohumları təqib olunur.
Masada 2005-ci ildə Ordubad rayonunu Nehrəm qəsəbəsindən qeyri-rəsmi deportasiya edilmiş Sahib Hüseynov da çıxış etdi. Naxçıvan Ali Məclisinə keçiriləcək seçkilərdə namizədliyini vermək istədiyini deyən S. Hüseynovun sözlərinə görə, bunun üçün onun Muxtar Respublikaya dönməsinə ehtiyac var: “Məni evimdən qovublar və geri dönməyimə imkan vermirlər”.
Dəyirmi masanın sonunda E. Abbasov, H. Mehdiyev Naxçıvanda insan haqlarının qorunması istiqamətində səylərini daha da artırmaq üçün bu gün yeni ictimai birlik – Regionlarda İnsan Hüquqlarının Monitorinqi təşkilatı təsis etdiklərini də elan etdilər.
Qeyd edək ki, dəyirmi masada QHT və KİV rəhbərləri, Azərbaycanda fəaliyyətdə olan diplomatik korpus və beynəlxalq qurumların nümayəndələri də iştirak edib.