Bu gün (18 avqust) 1 saylı cəzaçəkmə müəssisəsində hakim Rafael Əliyevin sədrliyi ilə “Yeni Fikir”Gənclər Hərəkatının sədri Ruslan Bəşirlinin vaxtından əvvəl azad edilməsi ilə bağlı müraciətinə əsasən keçirilməli olan məhkəmə prosesi təxirə salınıb.
Bakı şəhər Nizami rayon Məhkəməsindən Reportyorların Azadlıq və Təhlükəsizlik İnstitutuna (RATİ) verilən məlumata görə, dövlət ittihamçısı məhkəməyə hazır olmadığını əsas gətirərək, prosesin təxirə salınması barədə vəsatət qaldırıb və hakim R. Əliyev prosesi 22 avqust saat 15:00 -a təyin edib.
Xatırladaq ki, “Yeni Fikir” Gənclər Hərəkatının sədri Ruslan Bəşirli 2005-ci ilin 18 may tarixində parlament seçkiləri ərəfəsində həbs edilib. 2006-cı ilin iyulun 12-də Ağır Cinayətlərə Dair İşlər üzrə Məhkəmə Ruslan Bəşirlini Cinayət Məcəlləsinin 278-ci maddəsi ilə (hakimiyyəti zorla ələ keçirmə) ilə təqsirli bilərək 7 il müddətinə azadlıqdan məhrum edib. “Yeni Fikir” Gənclər Təşkilatı sədrinin 2005-ci ilin parlament seçkiləri ərəfəsində Müsavat, AXCP, ADP-nin yaratdığı “ Azadlıq” seçki blokunun mitinqlərində nümayiş etdirdiyi fəallığına görə şərlənərək həbs edilib.