Satirik şair Mirzə Sakit yanvarın 16-da başladığı aclıq aksiyasını Azərbaycan Demokrat Partiyasının (ADP) qərargahında davam etdirir.
Mirzə Sakit bu gün (18 yanvar) Reportyorların Azadlıq və Təhlükəsizlik İnstitutuna müsahibəsində bildirib ki, evdə aclıq aksiyası keçirmək mümkün olmayıb. “Mənə görə ailə üzvlərim də yemək yeyə bilmədikləri üçün dünəndən etibarən aclıq aksiyasını ADP-nin qərargahında davam etdirirəm” – deyən Mirzə Sakit əlavə etdi ki, taqəti çatanadək aksiyanı davam etdirəcək.
Xatırladaq ki, yanvarın 11-də təqdim etdiyi şeiri “Azadlıq” qəzetində çap olunmadığına görə M.Sakit yanvarın 14-də aclıq aksiyasına başlayıb. “Azadlıq” qəzetinin baş direktoru Azər Əhmədov təhqiredici ifadələr olduğuna görə şeirin çap olunmadığını bildirib. M.Sakit isə bildirir ki, şeirdə diktatura rejimləri sərt tənqid olunsa da, orda təhqiredici ifadələr yoxdur.
Qeyd edək ki, “Azadlıq” qəzeti 1989-cu ildən çıxır və gündəlik qəzet kimi fəaliyyət göstərir.