Bu gün (18 yanvar) Ali Məhkəmədə hakim Günəş Xudaverdiyevanın sədrliyi ilə “Korrupsiya və Cəmiyyət” jurnalının baş redaktoru Məmməd Əhmədoğlunun kassasiya şikayətinə baxılıb. Ali Məhkəmə kassasiya şikayətinin təmin edilməməsinə qərar verib.
Xatırladaq ki, Mətbuat Şurası “Korrupsiya və Cəmiyyət” jurnalını “reket mətbuat” siyahısına daxil etdiyi üçün M.Əhmədoğlu, Mətbuat Şurasının təkzib verərək üzr istəməsi və dəymiş maddi ziyana görə 4.000 (dörd min) manat, mənəvi ziyana görə 100000 (yüz min) manat ödəməsi barədə iddia qaldırmışdı. 30 iyun 2009-cu il tarixdə Binəqədi rayon Məhkəməsi iddianın təmin edilməməsi barədə qərar çıxarmış və Bakı Apellyasiya Məhkəməsi 16 sentyabr tarixində baş redaktorun apellyasiya şikayətinin təmin olunmamasına qərar vermişdi.
Qeyd edək ki, “Korrupsiya və Cəmiyyət” jurnalı 2005-ci ilin oktyabr ayında fəaliyyətə başlayıb. 2-3 ayda bir dəfə dərc olunan jurnal Mətbuat Şurası tərəfindən “reket” elan olunduqdan sonra mətbəələr çap etmədiyinə görə, nəşrini dayandırmaq məcburiyyətində qalıb.