“Azadlıq” qəzetinin əməkdaşı, satirik yazar Mirzə Sakit ( Zahidov) Nərimanov rayon Məhkəməsinin qərarından apellyasiya şikayəti verib.
Bu barədə RATİ-yə Mirzə Sakitin vəkili İsaxan Aşurov məlumat verib. Vəkilin sözlərinə görə, şikayət icraata götürülüb: ”İş hakim Rizvan Cəfərovun icraatındadır. Məhkəməyə hazırlıq iclası yanvar ayının 29-a təyin olunub”.
Xatırladaq ki, Mirzə Sakit vaxtından əvvəl azadlığa buraxılması ilə bağlı Nərimanov rayon Məhkəməsinə müraciət etmişdi. Lakin Nərimanov rayon Məhkəməsinin hakimi Rövşanə Vəliyevanın sədrlik etdiyi məhkəmə prosesində Mirzə Sakitin bu xahişi rədd edilmişdi.
Qeyd edək ki, Mirzə Sakit 2006-ci ilin iyun ayının 23-də narkotik vasitə ilə şərlənərək həbs olunub. Hazırda onun cəzasının bitməsinə təxminən 5 ay qalır.