QAZAX RAYONUNDA “YENİ MÜSAVAT”IN SATIŞINA QADAĞA QOYULUB

yanvar 27th, 2011
“Yeni Müsavat” qəzetinin əməkdaşı Leyla Mustafayevanın Qazaxda yaşayan qohumlarına təzyiqlər edilir və rayonda “Yeni Müsavat” qəzetinin satışına qadağa qoyulub. Bu barədə bu gün (27 yanvar) Reportyorların Azadlıq və Təhlükəsizlik İnstitutuna (RATİ) L. Mustafayevanın özü məlumat verib.

L. Mustafayeva bu təzyiqin  məhz onun peşə fəaliyyəti ilə bağlı olduğunu bildirdi:

“Yanvarın 25 də qəzetimizin səhifəsində “DSK sədrliyi 15 min manata satılır” başlıqlı yazı dərc edilmişdi və bu yazı Qazax rayonundan redaksiyamıza daxil olan məlumat əsasında hazırlanmışdı. Məlumatda Qazax seçki dairəsində dairə seçki komissiyası vəzifəsinin  “hərraca” çıxarılması, eləcə də rayonun icra başçısı Rauf Hüseynovun  bu vəzifədə çalışmaq istəyən namizədlərə “15 min manat ver, gəl otur” deməsi kimi ifadələr öz əksini tapmışdı. Məqalə qəzetdə dərc olunduqdan sonra rayonun icra başçısı Rauf Hüseynov tərəfindən  Qazaxdakı qohumlarıma təzyiqlər edilməyə başladı, icra başçısı yaxın qohumum,  Qazax Rayon Həmkarlar İttifaqının sədri Fərhad Qocamanovu çağıraraq danlayıb, onu işdən çıxaracağı ilə hədələyib. Aldığım məlumata görə, bu səbəbdən də qəzetimizin  rayonda satışına da məhdudiyyətlər qoyulub” – deyə Mustafayeva qeyd etdi.

 Qarşı tərəfin də münasibətini öyrənmək üçün gün ərzində Qazax rayon İcra Hakimiyyətinin (027 95 16 96) telefon nömrəsinə  etdiyimiz   zənglərinə isə cavab verən olmadı.

Qeyd edək ki, “Yeni Müsavat” qəzeti 1989-cu ildən fəaliyyət göstərir və gündəlik nəşr olunur.