Azərbaycan Dövlət Neft Şirkətinin Prezidenti Rövnəq Abdullayev jurnalist İdrak Abbasova qarşı əllərində faktların olduğunu və bunu açıqlayacaqlarını deyib. Bunu Londona səfəri zamanı o BBC Azərbaycancana müsahibəsində deyib. “Jurnalisti döyən Neft Şirkəti işçisinə qarşı niyə heç bir tədbir görülmür" sualına cavabında R.Abdullayev jurnalisti Sulutəpədə "alverlə məşğul olmaqda" ittiham edib. O ciddi cəhdlə İ.Abbasovun təxribatla məşğul olduğu və döyüldüyü ərazidə jurnalist fəaliyyəti ilə məşğul olmadığını sübut etməyə çalışıb.
Jurnalist İ.Abbasov isə R.Abdullayevin dediklərini şantaj və böhtan adlandırdı. “O məni həm hansısa qanunsuz qruplarla əlbirlikdə ittiham edir, həm təhqir edir və şantajdan da əl çəkmir. Əminəm ki əllərində mənə qarşı hər hansı bir fakt olsaydısa bunu çoxdan hakimiyyətin nəzarətində olan telekanallarda gündə 10 dəfə göstərərdilər”.
Yeri gəlmişkən qeyd edək ki, ARDNŞ əməkdaşları tərəfindən 2012-ci il aprelin 18-də qəddarlıqla döyülən İ.Abbasov həmin zaman aldığı travmaların nəticəsi olaraq bu günlərdə cərrahiyə əməliyyatı olunub və hazırda müalicəsini davam edir.
Xatırladaq ki, uzərində “Press” yazısı olan fərqləndirici jilet geyinmiş jurnalist ARDNŞ əməkdaşları və neft şirkəti tərəfindən onun torpaq sahələrini ələ keçirməkdə təqsirləndirilən yerli sakinlər arasında qarşıdurmanın video çəkilişini həyata keçirərkən qəddarlıqla döyülüb. İdrakın qabırğaları sındırılıb, kəllə-beyin travması alıb, gözü və daxili orqanları zədələnib.