V. İsgəndərov bu vəsatəti əsassız hesab etdiyini bildirib.
Hakim vəsatətlə bağlı qərarı günün sonuna təyin etdiyi prosesdə açıqlayıb və təmin edərək, iddianın digər işlərlə birləşdirilməsinə qərar verib.
Qeyd edək ki, hakim Reportyorların Azadlıq və Təhlükəsizlik İnstitutunun (RATİ) əməkdaşına prosesdə foto və video çəkiliş aparmasına icazə verməyib.
Hakim Abbas Rzayevin sədrliyi ilə Göyçay rayon Polis İdarəsinin rəisi Vüqar Məmmədyarovun, hakim Xaqani Tağıyevin sədrliyi ilə Göyçay rayon Polis Şöbəsinin inzibati təqiblər üzrə baş inspektoru Bəxtiyar Həşimovun iddiasına əsasən keçirilən proseslərdə də iddiaçı tərəf eyni vəsatətlə çıxış edib.
Bu vəsatətlərə isə 17 may tarixinə təyin olunmuş proseslərdə qərar veriləcək.
Xatırladaq ki, iddiaçılar “Azadlıq” qəzetinin 2 aprel tarixli sayında “Polis məndən 3 min manat rüşvət alıb” adlı yazıda V.İsgəndərovun ona böhtan atdığını hesab edərək, Cinayət Məcəlləsinin 147.2 (ağır və ya xüsusilə ağır cinayətdə ittiham etməklə böhtan atma) maddəsi ilə xüsusi ittiham qaydasında iddia qaldıraraq, cinayət məsuliyyətinə cəlb olunmasını istəyiblər.