Oktyabrın 29-da Nəsimi rayon Məhkəməsində hakim Elman Əhmədovun sədrliyi ilə Dövlət Sərhəd Xidmətinin (DSX) “Yeni Müsavat” qəzetinə qarşı mülki qaydada verdiyi iddiasına əsasən məhkəmə hazırlıq iclası keçirilib. Bu barədə bu gün (1 noyabr) Reportyorların Azadlıq və Təhlükəsizlik İnstitutuna (RATİ) qəzetin hüquqşünası Vaqif Hüseyn məlumat verib.
Xatırladaq ki, Dövlət Sərhəd Xidməti (DSX) “Yeni Müsavat” qəzetini qəzetin 28 aprel 2012-ci il tarixli sayında gedən “General da ev uçurur” başlıqlı yazı səbəbindən məhkəməyə müraciət edib. Yazıda Bakının Nəsimi rayonu, Süleyman Rəhimov küçəsi 175 saylı ünvanda yerləşən və DSX rəisi Elçin Quliyevin sahibi olduğu iddia edilən 4 mərtəbəli “Karat-İHH” otelinin layihədə nəzərdə tutulmayan mərtəbəsinin (mansard) tikintisinin otelə bitişik evlərə, eləcə də həmin küçədəki 177 saylı evin sahibi Əfqan Murtuzayevin də evinə təhlükə yaratması barədə xəbər gedib. İddiaçı cavabdehin 50 000 manat məbləğində cərimə edilməsini tələb edir.