2008-ci il noyabr ayının 14-də “İdeal” qəzetinin baş redaktoru Əli Həsənov Nəsimi rayon Məhkəməsinin hakimi Elmar Kərimovun çıxardığı qərarla 6 ay müddətinə azadlıqdan məhrum edilib.
RATİ baş redaktor haqqında seçilmiş cəzanı qeyri-adikvat hesab edir və bu qərarı kəskin pisləyir.
Qeyd edək ki, "Qarabağın Həcəri" ləqəbli Azərbaycan vətəndaşı Səbirə Mahmudova “İdeal” qəzetinin baş redaktoru Əli Həsənov və qəzetin təsisçisi Nazim Quliyevə qarşı xüsusi ittiham qaydasında iddia ( http://www.irfs.az/content/view/1493/28/lang,az/) qaldırmışdı.
Səbirə Mahmudova Dağlıq Qarabağ müharibəsinin iştirakçısıdır. Azərbaycan xalq eposu olan “Qaçaq Nəbi” qəhrəmanlıq dastanının qəhrəmanı olan qaçaq Nəbinin həyat yoldaşı Həcərin şərəfinə özünə Qarabağın Həcəri ləqəbini götürüb. Mahmudova Azərbaycanda bu ləqəblə tanınır.
İddiaya səbəb qəzetin 16 avqust 2008-ci il tarixli sayında "Misir Mərdanovun qudası, Hüseynbala Mirələmovun kirvəsi…." sərlövhəli, "İndi müəllimlik edən bir qadının əsl peşəsindən xəbərdarsınızmı" yarımsərlövhəli məqalə, 29 avqust 2008-ci il tarixli sayında isə "Müəllimə yoxsa mama Roza" sərlövhəli yazı olub.
Mahmudova "İdeal" qəzetinin mütəmadi olaraq onun şərəf və ləyaqətini təhqir etdiyini iddia edərək, qəzetin baş redaktoru Həsənov və təsisçisi Quliyevin Cinayət Məcəlləsinin 147.2 və 148-ci maddələri ilə cəzalandırılmasını, cavabdehlərin üzr istəməsini, qəzetin təkzib verməsini, habelə özünə dəymiş mənəvi ziyana görə qəzet redaksiyasının və Quliyevin 100.000 AZN məbləğində cərimələnməsini tələb edirdi.
Belə ki, həbs olunmamışdan öncə RATİ-nin əməkdaşları ilə söhbətində Həsənov həqiqətən də “İdeal” qəzetində Mahmudovanın təhqir olunduğunu etiraf edib. Amma o, Mahmudova ilə bağlı yazıların “İdeal” qəzetində dərc olunduğu zaman qəzetin baş redaktoru olmadığını və bu səbəbdən yazıda səslənən fikirlərə görə məsuliyyət daşımadığını bildirmişdi. Buna baxmayaraq Həsənov Mahmudovadan “İdeal” qəzetində yazdığı yazı ilə özünün və qəzetin təsisçisi Quliyevin adından üzürxahlıq edib.
RATİ “İdeal” qəzeti ilə bağlı bir-neçə məhkəmə iddiasının qaldırıldığını nəzərə alaraq, bu qəzet və qəzetə qarşı qaldırılmış iddialarla bağlı araşdırmalara başlayıb. Araşdırmaların sonu olaraq RATİ iddialar və qəzetin fəaliyyəti ilə bağlı rəyini ictimaiyyətə açıqlayacaq.
Belə ki, RATİ sözə görə kimsənin azadlıqdan məhrum edilməsinin əleyhinədir. Bu səbəbdən RATİ bir daha Azərbaycan hökumətini sözə görə həbsləri dayandırmağı, diffamasiyaya aid olan maddələrin Cinayət Məcəlləsindən çıxarmağa çağırır.