Dünən (16 noyabr) 1 saylı Bakı İnzibati-İqtisadi Məhkəməsində hakim Vüsalə Baxışovanın sədrliyi ilə Azərbaycan Dövlət Neft Akademiyasından (ADNA) xaric olunmuş tələbə-jurnalist Elmin Bədəlovun ADNA-ya qarşı “İddiaçının akademiyanın tələbələr sırasına bərpa edilməməyinin qanunsuz hesab edilməsi və iddiaçının tələbələr arasına bərpa edilməsi vəzifəsinin cavabdeh üzərinə qoyulması”na dair iddia üzrə işin icraatına xitam verib.
Xatırladaq ki, “Yeni müsavat” qəzetinin əməkdaşı Elmin Bədəlov 19 yanvar 2010-cu ildə Azərbaycan Dövlət Neft Akademiyasından xaric olunub. O, 12 noyabr 2009-cu il tarixdə təhsil müəssisəsindəki rüşvət halları və maliyyə fırıldaqları ilə bağlı pia.az saytında “Azərbaycan Dövlət Neft Akademiyasından reportaj” adlı məqalə yazdıqdan sonra təzyiqə məruz qaldığını bildirir və imtahanlardan qərəz nəticəsində kəsildiyini iddia edir. Pozulmuş təhsil hüququnun bərpa edilməsi üçün Nəsimi rayon Məhkəməsində Azərbaycan Dövlət Neft Akademiyasına və rektor Siyavuş Qarayevə qarşı iddia qaldırsa da, 05 aprel 2010-cu ildə iddianın təmin edilməməsi ilə bağlı qərar çıxarılıb. 2 iyul 2010-cu il tarixində Bakı Apellyasiya Məhkəməsi Nəsimi rayon Məhkəməsinin 5 aprel 2010-cu il tarixli qərarının qüvvədə saxlayaraq, şikayəti təmin etməyib. Ali Məhkəmə 23 noyabr 2010-cu il tarixində kassasiya şikayətinin təmin edilməməsi barədə qərar verib. ADNA və onun rektoruna qarşı ikinci məhkəmə iddiasını Nəsimi rayon Məhkəməsi 2 fevral 2011-ci ildə təmin etməyib. 2 iyun 2011-ci il tarixdə bu qərardan verilən apellyasiya şikayəti təmin edilməyib.