Martın 15-də Ali Məhkəmədə hakim Akif İsgəndərovun sədrliyi ilə “Yeni Müsavat” qəzetinin “Azəriqaz” İstehsalat Birliyinin rəisi Əkbər Hacıyevə qarşı informasiya sorğusunun cavablandırılmamağı ilə bağlı Bakı Apellyasiya Məhkəməsinin 22 oktyabr 2010-cu il tarixli qərarından verilmiş kassasiya şikayəti qismən təmin edilib. Bu barədə bu gün (16 mart) Reportyorların Azadlıq və Təhlükəsizlik İnstitutuna (RATİ) “Yeni Müsavat” qəzetinin hüquqşünası Vaqif Hüseyn məlumat verib.
Xatırladaq ki, “Yeni Müsavat” qəzeti “Azəriqaz” İstehsalat Birliyinin rəisi Əkbər Hacıyevə ünvanladığı sorğuda Bakı şəhərində fəaliyyət göstərən şadlıq evi kateqoriyasından olan obyektlərdə hər obyekt üçün və hər il üzrə ayrılıqda göstərilməklə 2007-2008-ci illərdə qaz istehlakının həcmi və ödəmə vəziyyəti haqqında məlumat istəyib. Bu sorğuya cavab verilmədiyi üçün qəzet Xətai rayon Məhkəməsinə müraciət edib. Məhkəmə iddianın rədd edilməsi barədə 21 aprel 2010-cu ildə qətnamə çıxarıb. 22 oktyabr 2010-cu ildə Apellyasiya Məhkəməsi birinci instansiya məhkəməsinin qətnaməsinin dəyişdirilmədən qüvvədə saxlanılması barədə qətnamə çıxarıb.
Qeyd edək ki, ölkənin ən çoxtirajlı qəzetlərindən olan “Yeni Müsavat” qəzeti 1989-cu ilin 10 noyabrdan gündəlik çap olunur.