Vəkil Samir İsayevin sözlərinə görə, 4 avqust 2011-ci il tarixində Bakı Apellyasiya Məhkəməsində keçirilən proses zamanı işin obyektiv baxışının təmin edilməsi üçün məhkəmə istintaqının keçirilməsi və Pənahlı ilə dostu haqqında olan həbs qətimkan tədbirinin dəyişdirilməsi barədə vəsatət qaldırılsa da, məhkəmə bu vəsatətləri təmin etməmişdi:
“Müdafiə tərəfi olaraq, biz də ilkin baxışın qərarından Ali Məhkəməyə kassasiya şikayəti versək də, şikayətimiz Ali Məhkəmə tərəfindən təmin edilmədi” deyə bildirən vəkil qeyd etdi ki, yaxın günlərdə Bakı Apellyasiya Məhkəməsində Nəsimi Rayon Məhkəməsinin qərarından verilmiş şikayətə baxılması davam etdiriləcək.
Xatırladaq ki, yanvarın 8-də Nemət Pənahlı öz dostu Ceyhun Fərzullayev ilə birlikdə vətəndaş Eldar Rzayevin şikayəti əsasında saxlanılıb. Yanvarın 10-da Nəsimi rayon Məhkəməsi Pənahlı və Fərzullayevi Cinayət Məcəlləsinin 221.3 maddəsi ilə (silah və ya silah qismində istifadə edilən əşyaları tətbiq etməklə xuliqanlıq) iki ay müddətinə həbs edib. Münaqişəyə səbəb Pənahlının Rzayevə satdığı avtomobil olmuşdu. Yanvarın 17-də Bakı Apellyasiya Məhkəməsi bu qərarı qüvvədə saxlamışdı. 17 iyun 2011-ci ildə Nəsimi rayon məhkəməsi Nemət Pənahlının 6 il, onun tanışı Ceyhun Fərzullayev barəsində isə 4 il müddətinə azadlıqdan məhrum edilməsi barədə hökm çıxarıb.
Pənahlının doğmaları və yaxınları isə hesab edirlər ki, onun və dostunun həbsi "P.S. Nota" qəzetində və ümumiyyətlə mətbuatda hakimiyyətin ünvanına söylədiyi tənqidi fikirlərlə bağlıdır.