Aprelin 20-də Ali Məhkəmədə hakim İslam Əliyevin sədrliyi ilə Seçkilərin Monitorinqi və Demokratiyanın Tədrisi Mərkəzinin (SMDT) qeydiyyata alınmamağı ilə bağlı Ədliyyə Nazirliyinə qarşı iddiası üzrə Apellyasiya Məhkəməsinin çıxardığı 3 dekabr 2010-cu il tarixli qərardan verilmiş kassasiya şikayəti üzrə məhkəmə prosesi keçirilib.
Ali Məhkəmə kassasiya şikayətinin təmin edilməməsi və Apellyasiya Məhkəməsinin 3 dekabr 2010-cu il tarixli qərarınının qüvvədə saxlanılması barədə qərar çıxarıb.
Xatırladaq ki, Seçkilərin Monitorinqi və Demokratik Tədrisi Mərkəzinin (SMDT) sədri Anar Məmmədli və təşkilatın təsisçisi Bəşir Süleymanlı 26 yanvar 2009-cu ildə birliyin dövlət qeydiyyatına alınması üçün Ədliyyə Nazirliyinə müraciət ediblər. Lakin Ədliyyə Nazirliyi təşkilatın sənədlərində müxtəlif çatışmazlıqların olduğunu qeyd edərək onu qeydə almaqdan imtina etdiyi üçün SMDT Yasamal rayon məhkəməsinə müraciət edib. 2 sentyabr 2009-cu il tarixində məhkəmə iddianın təmin edilməməsi barədə qərar çıxarıb. 17 dekabr 2009-cu ildə Apellyasiya Məhkəməsi Yasamal rayon Məhkəməsinin qərarını qüvvədə saxladığına görə, təşkilat Ali Məhkəməyə müraciət etmişdi. Ali Məhkəmə avqustun 13-də işə baxaraq işin baxılması üçün yenidən Apellyasiya Məhkəməsinə qaytarılması barədə qərar verib. Apellyasiya Məhkəməsi dekabrın 3-də iddianın təmin edilməməsi barədə qərar çıxarıb. İddiaçılar da bu qərardan kassasiya şikayəti vermişdilər.