Oktyabrın 9-da Şirvan Apellyasiya Məhkəməsində hakim İsmayıl Əhmədovun sədrliyi ilə "Qanun və Hüquq-2010" MMC-nin sədri, hüquq müdafiəçisi, bloger Taleh Xasməmmədovun və qarşı tərəfin verdiyi apellyasiya şikayəti üzrə proses keçirilib. Bu barədə bu gün (10 oktyabr) Reportyorların Azadlıq və Təhlükəsizlik İnstitutuna (RATİ) vəkil Əssabəli Mustafayev məlumat verib.
Vəkil bildirib ki, məhkəmədə özü, Taleh Xasməmmədov və dövlət ittihamçısı Siyavuş Sadıqov iştirak ediblər. İttiham tərəfdən isə prosesə qatılan olmayıb.Ə. Mustafayev müdafiə tərəfin gətirdiyi bütün arqument və sübutlara baxmayaraq, apellyasiya şikayətinin təmin edilmədiyini və bu qərardan kassasiya şikayəti veriləcəyini bildirdi.
Xatırladaq ki, Taleh Xasməmmədov 2011-ci il noyabrın 12-də həbs olunub. O polisin otağında xuliqanlıq etməkdə günahlandırılır və barəsində Cinayət Məcəlləsinin 221.2 (ictimai qaydanın qorunması üzrə vəzifəni yerinə yetirən və ya ictimai qaydanın pozulmasının qarşısını alan hakimiyyət nümayəndəsinə müqavimət göstərməklə xuliqanlıq) və 221.3 (silahdan və ya silah qismində istifadə edilən əşyaları tətbiq etməklə xuliqanlıq) maddələri ilə cinayət işi açılıb. Daha sonra isə ona qarşı 315-ci (hakimiyyət nümayəndəsinə qarşı zor tətbiq etmə və ya müqavimət göstərmə) maddəsi üzrə ittiham irəli sürülüb. Aptelin 20-də Kürdəımir rayon məhkəməsi onun 4 il azadlıqdan məhrum edilməsi barədə qərar çıxarıb. Taleh Xasməmmədov və qarşı tərəfin verdikləri apellyasiya şikayəti eyni icraatda birləşdirilib.