Noyabrın 8-də Yasamal rayon Məhkəməsində hakim Elçin Qurbanovun sədrliyi ilə Yasamal rayon icra hakimiyyəti başçısı İbrahim Mehdiyevin vətəndaş Yaqub Muradzadəyə qarşı xüsusi ittiham qaydasında qaldırdığı iddia üzrə məhkəmə prosesi keçirilib.
Onun sözlərinə görə, prosesdə özü, nümayəndəsi Əlibaba Rzayev və xüsusi ittihamçının nümayəndəsi Azər Tağıyev iştirak ediblər.
Y. Muradzadə bildirdi ki, hakim qarşı tərəfin vəkili Zaur Niftəliyevin də prosesdə iştirakının vacib olduğunu əsas gətirərək, növbəti məhkəmə prosesini 29 noyabr saat 15:00-a təyin etdi.
Xatırladaq ki, Mehdiyev Yaqub Muradzadənin onun barəsində müxtəlif dövlət qurumlarına şikayət məktubları yazaraq, məktublarda onu təhqir etdiyini və böhtana məruz qoyduğunu iddia edərək Cinayət Məcəlləsinin 147 (böhtan) və 148-ci (təhqir) maddələri ilə xüsusi ittiham qaydasında məhkəməyə şikayət edib.
Qeyd edək ki, Yaqub Muradzadə 2004-2006-cı ildə nəşr olunan və hazırda fəaliyyət göstərməyən “Yeni Qəzet”in redaktoru olduğunu bildirir.