Bu gün (25 oktyabr) Nərimanov rayon Məhkəməsində hakim Sənan Hacıyevin sədrliyi ilə “Xural” qəzetinin Bakı Apelyasiya Məhkəməsinin 18 iyul 2011-ci il tarixli qərarının icrasının dayandırılması ilə bağlı müraciətinə əsasən keçirilməli olan proses baş tutmayıb.
Qeyd edək ki, Vüqar Səfərli Əvəz Zeynallının müəllifi olduğu və “Xural” qəzetinin 25-31 iyul tarixli son sayında dərc olunmuş “İlham Əliyev “Xural”ın prezidenti deyil?!” başlıqlı yazıda barəsində “mətbu qəssab” ifadəsinin işlədilməsini şərəf və ləyaqətinin təhqir olunması hesab edərək, təkzib verilərək üzr istənilməsi və qəzetin 10.000 manat təzminat ödəməsi barədə Nərimanov rayon məhkəməsində iddia qaldırmışdı. Nərimanov rayon Məhkəməsi 12 oktyabr 2010-cu il tarixində iddianı qismən təmin edərək, Əvəz Zeynallının 500 manat həcmində cərimələnməsi barədə qərar verib. Hər iki tərəfin verdiyi şikayətə əsasən işə baxan apellyasiya məhkəməsi 500 manatlıq cəriməni 5000 manata qaldırıb. Bundan sonra apellyasiya və Ali Məhkəmə instansiyası qərarı qüvvədə saxlayıb. Belə ki, 7 fevral 2011-ci il tarixində Apellyasiya Məhkəməsi Nərimanov rayon Məhkəməsinin qərarını qüvvədə saxlayıb. 17 iyun 2011-ci il tarixində Ali Məhkəmə apelyasiya məhkəməsinin qərarını qüvvədə saxlanıldığını bildirən qərar elan edib.
Oktyabrın əvvəlində Nərimanov rayon icra şöbəsindən “Xural” qəzetinin redaksiyasına göndərdiyi bildirişdə göstərilir ki, qərar 10 gün müddətində icra olunmazsa, məcburi qayda təmin ediləcək. Bu səbəbdən də Əvəz Zeynallı icranın dayandırılması ilə bağlı məhkəməyə müraciət etmişdi.
Xatırladaq ki, “Xural” qəzeti 2002-ci ilin oktyabr ayının 6-dan həftəlik, 2011-ci il sentyabr ayının 20-dən isə gündəlik dərc olunur.