Martın 6-da Kürdəmir rayon məhkəməsində hakim Rafiq Bağırovun sədrliyi ilə “Qanun və Hüquq-2010” Məhdud Məsuliyyətli Cəmiyyətinin sədri, hüquq müdafiəçisi və bloger Taleh Xasməmmədovun cinayət işi üzrə məhkəmə prosesi keçirilib.
Obyektiv tv-yə müsahibəsində Əsabəli Mustafayev prosesdə zərərçəkmiş kimi iştirak edən polis əməkdaşlarının ziddiyyətli ifadələr verdiyini və vəkilin suallarından yayındıqlarını, prosesin gedişinə mane olduqlarını deyib.
Taleh Xasməmmədov isə çıxışında Polis İdarəsində ona qarşı təxribat törədildiyini bildirib, bunun hüquq müdafiəçiliyi və blogerliyi ilə əlaqədar olduğunu məhkəmənin diqqətinə çatdırıb. Xasməmmədov Göyçay və ətraf rayonların sakinlərinin hüquq mühafizə orqanlarının qanunsuz əməlləri ilə bağlı ona dəfələrlə müraciət etdiklərini və müraciətlər əsasında araşdırma apardığını, həbsinin də məhz bununla bağlı olduğunu vurğulayıb.
Hakim növbəti məhkəmə prosesini martın 13-ə təyin edib.
Xatırladaq ki, Taleh Xasməmmədov 2011-ci il noyabrın 12-də həbs olunub. O polisin otağında xuliqanlıq etməkdə günahlandırılır və barəsində Cinayət Məcəlləsinin 221.2, 221.3 (xuliqanlıq) maddələri ilə cinayət işi açılıb. Daha sonra isə ona qarşı 315-ci (hakimiyyət nümayəndəsinə qarşı zor tətbiq etmə və ya müqavimət göstərmə) maddəsi üzrə ittiham irəli sürülüb.