Elçin Sadıqov çıxışında Konstitusiyada göstərilən məlumat almaq hüququnun nəzərə alınmasını və iddianı təmin edən qətnamənin çıxarılmasını məhkəmədən xahiş etdi.
Cavabdehin nümayəndəsi Çingiz Nəcəfov sorğunun qərəzli olduğunu və onun nazirliyin imicinə xələl gətirmək məqsədi daşıdığını bildirərək, iddianın rədd olunmasını xahiş etdi.
Hakim müşavirədən qayıtdıqdan sonra iddianın təmin edilməməyi barədə qərar verdi.
Prosesdən sonra iddiaçının vəkili Elçin Sadıqov Reportyorların Azadlıq və Təhlükəsizlik İnstitutuna bu qərarından apellyasiya şikayəti verəcəklərini deyib.
Xatırladaq ki, “Turan” informasiya agentliyi sentyabrın 21-də Ekologiya və Təbii Sərvətlər Nazirliyinə Azərbaycanın bir sıra rayonlarında yüz min hektardan çox torpağı, milyonlarla kvadrat metr yaşayış yerlərini yararsız hala salmış, habelə mal-qara və digər heyvanların tələf olmasına gətirib çıxarmış daşqından sonra Kür çayının deltasında vəziyyətlə bağlı sorğu göndərib. Nazirlik rəsmi sorğuya cavab verilməsi müddətini pozduğundan “Turan” informasiya agentliyi “İnformasiya əldə edilməsi haqqında” Qanunun 9-cu, 24-cü, 29-cu və 37-ci maddələrinə əsasən Ekologiya və Təbii Sərvətlər Nazirliyini məhkəməyə verib.