Aprelin 19-da Avropa Birliyi və Avropa Şurasının dəstəyi ilə Media Hüququ İnstitutunun təşkil etdiyi Əsas İnsan Hüquq və Azadlıqları haqqında Avropa Konvensiyasının 10-cu maddəsi ilə bağlı iki günlük seminar işinə başlayıb. Seminarın açılış çıxışını edən Media Hüququ İnstitutunun direktoru Rəşid Hacılı Azərbaycanda ifadə azadlığı probleminin aktuallığını qeyd edib ki, bu da Kütləvi İnformasiya Vasitələrinə qarşı çoxsaylı məhkəmə iddialarında, diffamasiyaya görə jurnalistlərin təqib olunmasında özünü göstərir.
Avropa Şurasının Bakı ofisinin rəhbəri Konstantın Yerokostopolos bildirib ki, indiki seminar əlaqədar tərəflərin Avropa Konvensiyasının 10-cu maddəsinin tətbiqi üzrə Strasburq məhkəməsinin praktikası sahəsində biliklərinin artırılmasına yönəlib. Söhbət əsasən diffamasiya, təhqir, düzgün həyatın müdafiəsi, informasiya azadlığından gedəcək. 10-cu maddənin tətbiqinin təkmilləşdirilməsi ifadə azadlığının pozulmasının və məhkəmə çəkişmələrinin minimuma endirilməsinə imkan verəcək. Avropa Şurası Media Departamentinin nümayəndəsi Leyla Dervisaçiç qeyd edib ki, seminar KİV-də peşəkarlığın artırılmasına və Azərbaycanda plüralist mətbuatın inkişafına yönəlib.
Seminarın sessiyasının 1-ci hissəsində avstriyalı hüquqşünas Albrex Haller Avropa İnsan Hüquqları Məhkəməsinin 10-cu maddəsi ilə bağlı qərarlarına baxış ilə bağlı məruzə ilə çıxış edib. Daha sonra isə Millət vəkili Fazil Mustafayev Azərbaycanın İfadə Azadlığı qanunvericiliyinin Avropa Standartlarına uyğunluğu mövzusunda məruzə ilə çıxış edib.
Seminar zamanı Fransalı Hüquqşünas Frederik Qras Avropa İnsan Hüquqları Məhkəməsinin Defamasiya və tənqidi ilə bağlı qərarlar barədə əlumat verib.
Seminarın 2-ci sessiyasında Media Hüququ İnstitutunun direktoru Rəşid Hacılı İfadə Azadlığı hüququ ilə bağlı Azərbaycan qanunvericiliyinin durumu və yerli məhkəmə təcrübəsi barədə məruzə ilə çıxış edib.