ABŞ səfirliyinin ictimaiyyətlə əlaqələr şöbəsinin rəhbəri Conatan Henik 26 martdan aclığa başlayan Eynulla Fətullayevin tələblərinə münasibət bildirib
: ”Baş redaktorun atası ilə görüşdüm, onun dediklərini və oğlunun vəziyyəti ilə bağlı məlumatları xanım səfirə çatdırdım. Bizim bu mövzuda mövqeyimiz dəyişməz olaraq qalır”. Hər zaman azad jurnalistikaya dəstək olduqlarını deyən Henik, azad jurnalistikanın demokratiyanın ayrılmaz hissəsi olduğunu bildirib: “Həbsdə aclıq aksiyası keçirmək çox təhlükəlidir. Təəssüf ki, onlar belə addımlar atmağa məcbur olurlar. Biz bu məsələləri dəfələrlə ikitərəfli münasibətlərimizdə qaldırırıq və buna davam edəcəyik. Ümid edirəm ki, problemlər bir istiqamətdə öz həllini tapacaq. Lakin bu bizim əlimizdə deyil”.
Məlumat “Yeni Müsavat” qəzetinin bu günki sayında verilib.
Qeyd edək ki, bu gün ABŞ-ın Azərbaycandakı səfiri Enn Dersi “Azadlıq” qəzetinin həbsdə olan baş redaktoru Qənimət Zahidin evində qonaq olub. Bu barədə Reportyorların Azadlıq və Təhlükəsizlik İnstitutuna (RATİ) Q.Zahidin həyat yoldaşı Ayəndə Mürsəliyeva verib. Onun bildirdiyinə görə səfir demokratiyanı, söz azadlığını dəsdəklədiklərini və jurnalistlərin həbsini pislədiklərini deyib. A.Mürsəliyeva bu cür sözlərin bütün xarici təşkilatların və səfirliklərin dilindən eşitdiyini, yalnız heç bir konkret nəticənin olmadığını səfirin diqqətinə çatdırıb: “Yaxşı olardı ki, siz özünüz ölkə başçısı ilə görüşüb bu məsələləri onu diqqətinə çatdırasınız.”