BMT İnsan Haqları Komitəsi ölkədə söz və ifadə azadlığını təmin eləmədiyi üçün Azərbaycan hökumətini kəskin tənqid eləyib.
Azərbaycanda söz azadlığının pisləşməsi, qəzetlərin bağlanması və internet yazarlarının həbsi İnsan Haqları Komitəsinin kəskin narazılığına səbəb olub.
Komitə bildirir ki, Azərbaycanda jurnalistlərə qarşı davamlı olaraq zorakılıq və təzyiqlər olur, həmçinin qurama böhtan və xuliqanlıq ittihamlarıyla media susdurulur.
BMT İnsan Haqları Komitəsi Azərbaycanı bu hallara dərhal son verməyə, söz və ifadə azadlığını təmin etmək üçün bütün lazımi addımları atmağa, həbsdəki jurnalistləri, o cümlədən bu yaxınlarda həbs edilən Adnan Hacızadə və Emin Milli kimi internet yazarlarını dərhal azad eləməyə çağırıb.
Xatırladaq ki, iyulun 20-21-də Cenevrədə keçirilmiş Birləşmiş Millətlər Təşkilatının (BMT) İnsan Hüquqları Komitəsinin 96-cı sessiyası çərçivəsində Azərbaycanda insan haqlarının vəziyyəti ilə bağlı müzakirələrdə Azərbaycandan Hüquq Müdafiəçilərinin Cənubi Qafqaz Şəbəkəsinə daxil olan 8 hüquq müdafiə təşkilatının (Hüquq Maarifçiliyi Cəmiyyəti, Reportyorların Azadlıq və Təhlükəsizlik İnstitutu, Media Hüquq İnstitutu, Dilarə Əliyeva adına Qadınların Hüquqlarını Müdafiə Cəmiyyəti, Sülh və Demokratiya İnstitutu, Humanitar Araşdırmalar Cəmiyyəti, Tələbələrin Beynəlxalq Əməkdaşlığı İctimai Birliyi, Azad İqtisadiyyata Yardım İctimai Birliyi ) təmsilçisi Rəsul Cəfərov Azərbaycanda insan haqlarının bir neçə sahəsindəki problemlər (söz və fikir azadlığı, sərbəst toplaşmaq azadlığı, ədalətli məhkəmə hüququ, qadınlara qarşı ayrı-seçkilik və onlara qarşı zorakılıq) barəsində alternativ hesabat təqdim etmiş və insan haqları və Azərbaycanda söz azadlığı ilə bağlı Komitə üzvlərinin suallarını cavablandırmışdı.