Reportyorların Azadlıq və Təhlükəsizlik İnstitutu “Hədəf” Gənclər koalisiyasının rəhbəri Ağasif Şakiroğlunun (İbrahimov) həbsini qətiyyətlə pisləyir.
Belə ki, bu gün (03 avqust) səhər saat 00.06 radələrində Ağasif Şakiroğlu yaşadığı mənzildə Nərimanov Rayon Polis İdarəsinin 18-ci polis bölməsinin əməkdaşları tərəfindən həbs edilib və Nərimanov rayon prokurorluğunda ona qarşı Cinayət Məcəlləsinin 321.1-ci (Qanuni əsas olmadan hərbi xidmətdən yayınmaq üçün növbəti hərbi çağırışdan və ya səfərbərlik üzrə çağırışdan boyun qaçırma) maddəsi ilə ittiham irəli sürülüb. A.Şakiroğlu isə bildirir ki, onu ictimai-siyasi fəaliyyətinə görə və www.mia.az saytında Azərbaycan Müdafiə Nazirliyinin ünvanına tənqidi fikirlərinə görə təqib edirlər və hərbi xidmətdən boyun qaçırmayıb. Bir neçə dəfə Nərimanov rayon hərbi komissarlığından ona deyiblər ki, lazım olanda çağırış vərəqəsi göndəriləcək. Buna baxmayaraq Nərimanov rayon məhkəməsində A.Şakiroğlunun barəsində 1 ay müddətinə həbs qətimkan tədbirinin seçilməsinə qərar verib.
RATİ Azərbaycan hökumətini fikirlərini azad ifadə etməyə görə insanların təqib olunmasına son qoymağa və həbs olunmuş gənci dərhal azad etməyə çağırır.